Amo 9 | NdeIBE | STEP | Ngabona uJehova emi phansi kwe-alithare, wasesithi: “Tshaya izihloko zezinsika ukuze imibundu inyikinyeke. Ziwisele phansi phezu kwamakhanda abantu bonke; labo abazasala ngizababulala ngenkemba. Kakho lamunye ozaphunyuka, kakho ozabaleka.

Amos 9

U-Israyeli uzachithwa

1 Ngabona uJehova emi phansi kwe-alithare, wasesithi: “Tshaya izihloko zezinsika ukuze imibundu inyikinyeke. Ziwisele phansi phezu kwamakhanda abantu bonke; labo abazasala ngizababulala ngenkemba. Kakho lamunye ozaphunyuka, kakho ozabaleka.

2 Loba besimba baze bafike ekudepheni kwengcwaba, isandla sami sizabathatha khonapho. Loba bekhwela baye phezulu emazulwini, bekhonapho ngizabehlisela phansi.

3 Loba becatsha engqongweni yeKhameli, khonapho ngizabadinga ngibabambe. Loba bengicatshela enzikini yolwandle, khonapho ngizalaya inyoka ukuba ibalume.

4 Loba izitha zabo zingabasa ekuthunjweni, khonale ngizalaya inkemba ukuba ibabulale. Ngizagxilisa amehlo ami kubo ngenxa yobubi hatshi ngobuhle.”

5 UJehova, uJehova uSomandla, yena othinta umhlaba uncibilike, kuthi bonke abahlezi kuwo bakhale – ilizwe lonke liyaphakama njengoNayili liphinde litshone phansi njengomfula waseGibhithe –

6 yena owakha indlu yakhe yobukhosi ephakemeyo emazulwini njalo ubeka isisekelo sakhe phezu komhlaba, ebiza amanzi olwandle awathele phezu kobuso bomhlaba – uJehova yilo ibizo lakhe.

7 “Lina ma-Israyeli, kimi kalinjengamaKhushi na?” kutsho uJehova. “U-Israyeli kangimkhuphanga eGibhithe, lamaFilisti eKhafithori, kanye lama-Aramu eKhiri na?

8 “Impela amehlo kaJehova Wobukhosi aphezu kombuso olesono. Ngizawukhucula ebusweni bomhlaba ikanti indlu kaJakhobe angiyikuyichitha ngokupheleleyo,” kutsho uJehova.

9 “Ngoba ngizakhupha ilizwi, njalo ngizahlungula indlu ka-Israyeli phakathi kwezizwe zonke njengokuhlungulwa kwamabele ekhomaneni njalo akukho hlamvu oluzawela phansi.

10 Izoni zonke phakathi kwabantu bami zizakufa ngenkemba, bonke labo abathi, Umonakalo kawuyikusifica loba usihlangabeze.’

Ukubuyiswa kuka-Israyeli

11 “Ngalolosuku ngizavusa ithente likaDavida elawayo. Ngizavala izikhala zalo, ngivuselele okwadilikayo kwalo, ngilakhe njengelaliyikho khona,

12 ukuze bathathe insalela ye-Edomi kanye lezizwe zonke ezizabizwa ngebizo lami,” kutsho uJehova, ozazenza lezizinto.

13 “Izinsuku ziyeza,” kutsho uJehova, “lapho ovunayo ezaficwa ngolimayo, lohlanyelayo aficwe ngokhama amavini. Iwayini elitsha lizagobhoza ezintabeni, njalo ligeleze emaqaqeni wonke.

14 “Ngizababuyisela emuva abantu bami bako-Israyeli abathunjwayo; bazawakha kutsha amadolobho adilikayo bahlale kuwo. Bazahlanyela izivini banathe iwayini lazo; bazakwenza izivande badle izithelo zazo.

15 Ngizagxumeka u-Israyeli elizweni lakhe angaphindi asitshunwe futhi elizweni engimnike lona,” kutsho uJehova uNkulunkulu.